Халқ депутатлари Тошкент шаҳар Кенгашининг ўн бешинчи сессияси бўлиб ўтди. Сессия ишини халқ депутатлари Тошкент шаҳар Кенгаши раиси, шаҳар ҳокими Раҳмонбек Усмонов олиб борди. Бу ҳақда ҳокимлик матбуот хизмати хабар бермоқда.
Унда фуқаролар йиғинлари раислари (оқсоқоллари) ва уларнинг маслаҳатчилари сайловлари якунлари, ёшларга оид давлат сиёсатини амалга ошириш, кичик бизнес, хусусий тадбиркорликни ишончли ҳимоя қилиш, иш ўринлари ташкил этиш ва аҳоли бандлигини таъминлаш, «Соғлом она ва бола йили» давлат дастурининг устувор вазифалари, 9-синф битирувчиларини академик лицей ва касб-ҳунар коллежларига қамраб олиш ва шаҳар Кенгаши ваколатига оид бошқа масалалар атрофлича кўриб чиқилди.
Бу йилги сайловларда жами 370 нафар маҳалла оқсоқоллари алмашди. Жумладан, сайланган маҳалла раисларининг 47 нафарини аёллар ташкил этди. 505 та маҳалла раисларига маслаҳатчи этиб 7439 нафар фуқаро сайланди. Сайланган маслаҳатчиларнинг 1920 нафарини аёллар ташкил этди.
Сессияда биринчи маротаба фуқаролар йиғинлари раислари (оқсоқоллари) этиб сайланганлар билан ҳуқуқий билимларини ошириш ҳамда фуқаролар ўзини ўзи бошқариш органларининг фаолият юритиши билан боғлиқ амалдаги қонун ҳужжатларининг қоидаларини ўрганиш, уларнинг фаолиятини ташкил этиш, ёшларни касб-ҳунарга йўналтириш, кичик ва хусусий тадбиркорлик, оилавий бизнесни ривожлантириш, аҳолини манзилли ижтимоий қўллаб-қувватлаш, жамоатчилик назорати, табиатни муҳофаза қилиш, ҳудудларни ободонлаштириш ва кўкаламзорлаштириш, жамиятда тинчлик ва осойишталикни таъминлаш масалалари юзасидан ўқувлар ташкил этиш белгиланди.
«Ўзбекистон Республикасида ёшларга оид давлат сиёсатининг асослари тўғрисида»ги Ўзбекистон Республикаси Қонуни ва Тошкент шаҳрида жорий йилда ёшларга оид давлат сиёсатини амалга оширишга қаратилган ҳудудий чора-тадбирлар дастурининг ижроси бўйича олиб борилаётган ишлар кўриб чиқилди. Туман ҳокимликларига ва мутасадди ташкилот раҳбарларига бир ой муддатда ёшларнинг бўш вақтларини мазмунли ўтказилишини таъминлаш мақсадида «Камолот» китоб дўконлари фаолиятини йўлга қўйиш бўйича тегишли таклиф киритиш ва бу борада ишлар мувофиқлаштирган ҳолда олиб бориш тавсия этилди. Ёшлар бандлигини таъминлаш, уларни бунёдкорлик ишларига жалб қилиш мақсадида «Бунёдкор» ёшлар меҳнат ҳаракати фаолиятини янада кенгайтириш зарурлиги таъкидланди.
Изоҳ (0)