YuNESKOning Jahon merosi qo‘mitasi Qashqadaryo viloyatidagi Shahrisabz shahrining tarixiy markazini xavf ostida bo‘lgan jahon merosi obyektlari ro‘yxatiga kiritdi, deya xabar bermoqda “Gazeta.uz” tashkilot saytiga tayanib.
Bunday qaror qo‘mitaning 10—20-iyul kunlari Istanbulda bo‘lib o‘tayotgan 40-sessiyasida Shahrisabz tarixiy markazida “sayyohlik infratuzilmasi haddan tashqari rivojlantirilishi” tufayli qabul qilindi, deyiladi xabarda.
Yoshi 2000 yildan oshadigan Shahrisabz tarixiy markazi YuNESKOning Jahon merosi obyektlari ro‘yxatiga 2000-yilda kiritilgan. Bu yerdagi me’moriy yodgorliklar va butun bir qadimiy dahalar Amir Temur va Temuriylar hukmronligi davriga tegishli.
13-iyul kuni bo‘lib o‘tgan majlisda Jahon merosi qo‘mitasi “Jahon merosi obyektining o‘rta asrlarga taalluqli dahalari markazidagi binolarning buzilishi va zamonaviy obyektlar, jumladan, mehmonxonalar va tarixiy Shahrisabzning tashqi qiyofasiga ortga qaytarib bo‘lmaydigan o‘zgartirish kiritgan boshqa binolar qurilishi” yuzasidan xavotir bildirdi, deyiladi xabarda.
Izoh (0)