Fransiyada davom etayotgan Yevropa Chempionatining “F” guruhidagi olti uchrashuvdan faqatgina 2 tasida g‘olib jamoani aniqlashning imkoni bo‘ldi. Vengriya va Islandiya terma jamoalari Avstriyani mag‘lub etishga muvaffaq bo‘ldi. Qolgan barcha uchrashuvlarda kuchlar teng keldi.
Guruhdagi so‘nggi turda Avstriya Islandiyaga 1:2 hisobida imkoniyatni boy berdi. Yevro—2016 kashfiyotlaridan biri sifatida e’tirof etilgan Islandiya 94-daqiqaga kelib ikkinchi golni kiritishga erishdi.
Avstriya terma jamoasi turnirdagi ishtirokini davom ettirishi uchun zafar quchishi kerak edi. Biroq uchrashuvning 37-daqiqasida Aleksandar Dragovich penaltidan aniq foydalana olmadi. Uning zarbasi darvoza ustuniga tegib qaytdi. Qayd etish kerak, Dragovich Vengriyaga qarshi kechgan 1-turda qizil kartochka olib maydonni tark etgandi.
Portugaliya va Vengriya termalari o‘yinida 3:3 hisobi qayd etildi. Tomonlar hisob borasida quvlashmachoq o‘ynadi. Vengerlar uch bor oldinga chiqib olgan bo‘lsa, Portugaliya har safar muvozanatni tiklashga erishdi.
Vengriya safida Bolaj Judjak, Portugaliyada esa Krishtianu Ronaldu dubl qayd etishga muvaffaq bo‘ldi. Shu tariqa Krishtianu Ronaldu ketma-ket 4 ta Yevropa Chempionatida gol urgan birinchi futbolchiga aylandi.
Guruh o‘yinlarini Vengriya va Islandiya 5, Portugaliya 3, Avstriya 1 ochko bilan yakunladi. “F” guruhida dastlabki uch o‘rinni qo‘lga kiritgan terma jamoalar musobaqadagi ishtirokini davom ettiradigan bo‘ldi.
[wpse_match id="351465" show_title=1]
[wpse_match id="351466" show_title=1]
Izoh (0)