Toshkentning harakat cheklanadigan ko‘chalari, Hyatt Regency mehmonxonasining ilk fotosuratlari, O‘zbekistondagi salqin havo va kunning boshqa muhim yangiliklari

15-iyunning e’tiborga molik yangiliklari — “Daryo”ning kechki dayjestida.

1. Toshkentning bir nechta ko‘chalarida ta’mirlash ishlari munosabati bilan transport vositalarining harakati vaqtincha cheklandi. 15-iyun, chorshanba kuni Toshkent shahrining bir nechta ko‘chalarida ta’mirlash ishlari olib borilayotganligi munosabati bilan harakat xavfsizligini ta’minlash maqsadida transport vositalarining harakati vaqtincha cheklangan.

2. Toshkentda qurib bitirilayotgan Hyatt Regency mehmonxonasining ilk fotosuratlari taqdim etildi. Mehmonxonaning rasmiy ochilishi 2016-yilning 1-iyuliga belgilangan.

3. Toshkentdagi yomg‘irli salqin havo 16-iyunda ham saqlanib qoladi. 16-iyun, payshanba kuni kunduzi Toshkent shahrida havo harorati +28…+30 daraja, Qoraqalpog‘iston Respublikasi va Xorazm viloyatida +33…+38 daraja, qolgan hududlarda +28…+33 daraja iliq bo‘ladi.

4. Bolalarni ramazon qo‘shiqlarini aytishdan qaytarish tavsiya etildi. “Islom.uz” saytining savol-javoblar bo‘limida foydalanuvchilardan biri anchadan buyon mavjud bo‘lgan an’ana — bolalarning ramazon qo‘shiqlarini aytib, pul yig‘ib yurishi to‘g‘ri-noto‘g‘riligiga qiziqdi.

5. Kaliforniyada dunyodagi eng yirik quyosh elektr stansiyasi ishga tushirildi. Salkam 13 kvadrat kilometr maydonga ega obyekt uch elektr stansiyasi va deyarli 350 ming ko‘zgu-geliostatdan iborat bo‘lib, quvvati salkam 392 megavatt, qiymati esa 2,2 milliard dollarga teng.