AQShning Florida shtatida “Kolin” tropik po‘rtanasi yopirilishi munosabati bilan favqulodda holat joriy etildi. 6-iyun, dushanba kuni gubernator Rik Skott tomonidan imzolangan qaror Milliy gvardiyani safarbar etish va federal hukumatdan tabiiy ofat oqibatlarini bartaraf etish uchun kerakli yordamni navbatdan tashqari olish imkonini beradi. Bu haqda “TASS” ma’lum qildi.
Gubernator Milliy gvardiyaning 6000 kishidan iborat zaxira qismlarini kuchaytirilgan tayyorgarlik tartibiga keltirish, elektr ta’minotida uzilish bo‘lgan va svetoforlar o‘chgan taqdirda avtoyo‘llarni yopish, harakatni tartibga solish uchun javob beradigan 250 kishidan iborat guruh tuzishga buyruq berdi.
AQSh meteorologiya milliy xizmatiga ko‘ra, Florida janubida shamol tezligi soatiga 80,5 kilometrga yetmoqda, yoqqan yog‘inlar miqdori esa 12,7 santimetrni tashkil etdi. Po‘rtana siljishiga qarab ob-havo sharoiti yanada yomonlashib boradi.
Izoh (0)