АҚШнинг Флорида штатида «Колин» тропик пўртанаси ёпирилиши муносабати билан фавқулодда ҳолат жорий этилди. 6 июнь, душанба куни губернатор Рик Скотт томонидан имзоланган қарор Миллий гвардияни сафарбар этиш ва федерал ҳукуматдан табиий офат оқибатларини бартараф этиш учун керакли ёрдамни навбатдан ташқари олиш имконини беради. Бу ҳақда «ТАСС» маълум қилди.
Губернатор Миллий гвардиянинг 6000 кишидан иборат захира қисмларини кучайтирилган тайёргарлик тартибига келтириш, электр таъминотида узилиш бўлган ва светофорлар ўчган тақдирда автойўлларни ёпиш, ҳаракатни тартибга солиш учун жавоб берадиган 250 кишидан иборат гуруҳ тузишга буйруқ берди.
АҚШ метеорология миллий хизматига кўра, Флорида жанубида шамол тезлиги соатига 80,5 километрга етмоқда, ёққан ёғинлар миқдори эса 12,7 сантиметрни ташкил этди. Пўртана силжишига қараб об-ҳаво шароити янада ёмонлашиб боради.
Изоҳ (0)