27-may kuni Angren-Pop elektrlashtirilgan temir yo‘l uchastkasidan tajriba tartibida birinchi poyezd o‘tdi. Bu haqda, “O‘zbekiston temir yo‘llari” AJ matbuot xizmatiga asoslanib, “Gazeta.uz” xabar bermoqda.
Temir yo‘lning “Qamchiq” tunneli ichidagi 11-kilometrida relslar tutashtirildi. Shundan so‘ng tajribaviy sostav Angren stansiyasidan Pop stansiyagacha bo‘lgan yo‘lni bosib o‘tdi.
Angren-Pop temir yo‘li 123,1 kilometr uzunlikka ega bo‘lib, bu masofaning 19,1 kilometrlik qismi tunneldan iborat.
Tunneldagi burg‘ulash ishlari Xitoyning China Railway Tunnel Group kompaniyasi bilan hamkorlikda, po‘lat polotnoni yotqizish ishlari esa “O‘zbekiston temir yo‘llari”ning o‘z kuchi bilan o‘tkazildi. Ayni paytda loyihaning yakuniy bosqichi — muhandislik ishlarini yo‘lga qo‘yish va yo‘lni elektrlashtirish bo‘yicha tadbirlar amalga oshirilmoqda.
2015-yilning avgust oyida yangi temir yo‘lning 104 kilometrlik uchastkasida qurilish ishlari yakunlandi. Barcha zaruriy ishlar amalga oshirildi, ko‘priklar va sun’iy inshootlar barpo etildi, relslar yotqizildi, elektrlashtirish olib borildi, shuningdek, vokzal va stansiyalar qurildi. Joriy yilning fevral oyida burg‘ulash ishlari yakunlandi, so‘ng tunnelning asosiy yo‘nalishi tutashtirildi.
Izoh (0)