27 май куни Ангрен-Поп электрлаштирилган темир йўл участкасидан тажриба тартибида биринчи поезд ўтди. Бу ҳақда, «Ўзбекистон темир йўллари» АЖ матбуот хизматига асосланиб, «Газета.uz» хабар бермоқда.
Темир йўлнинг «Қамчиқ» туннели ичидаги 11-километрида рельслар туташтирилди. Шундан сўнг тажрибавий состав Ангрен станциясидан Поп станциягача бўлган йўлни босиб ўтди.
Ангрен-Поп темир йўли 123,1 километр узунликка эга бўлиб, бу масофанинг 19,1 километрлик қисми туннелдан иборат.
Туннелдаги бурғулаш ишлари Хитойнинг China Railway Tunnel Group компанияси билан ҳамкорликда, пўлат полотнони ётқизиш ишлари эса «Ўзбекистон темир йўллари»нинг ўз кучи билан ўтказилди. Айни пайтда лойиҳанинг якуний босқичи — муҳандислик ишларини йўлга қўйиш ва йўлни электрлаштириш бўйича тадбирлар амалга оширилмоқда.
2015 йилнинг август ойида янги темир йўлнинг 104 километрлик участкасида қурилиш ишлари якунланди. Барча зарурий ишлар амалга оширилди, кўприклар ва сунъий иншоотлар барпо этилди, рельслар ётқизилди, электрлаштириш олиб борилди, шунингдек, вокзал ва станциялар қурилди. Жорий йилнинг февраль ойида бурғулаш ишлари якунланди, сўнг туннелнинг асосий йўналиши туташтирилди.
Изоҳ (0)