BMTning Nyu-Yorkdagi bosh shtabida Bosh Assambleya 70-sessiyasining rasmiy hujjati sifatida 2015-yilda O‘zbekiston Respublikasida narkotikka qarshi siyosatning asosiy yo‘nalishlari va ularning amalga oshirilishi haqidagi axborot oltita rasmiy tilda tarqatildi, deb yozadi UzDaily.
Hujjatda ta’kidlanishicha, mamlakatda 2011—2015-yillar uchun Narkotiklarni suiiste’mol qilishga va ularning noqonuniy aylanishiga qarshi kurash bo‘yicha kompleks chora-tadbirlar dasturiga muvofiq, narkotiklarga talab va taklifni qisqartirish bo‘yicha ishlarga katta e’tibor qaratiladi. 2016—2020-yillar uchun ham bunday dastur loyihasi tayyorlangan.
Bundan tashqari, materialda 2015-yilda O‘zbekistonning huquq-tartibot organlari xodimlari narkotrafikni to‘sish choralari olib borgani, bunda asosiy e’tibor mamlakat ichkarisida ham, mamlakat orqali ham narkotiklarning noqonuniy savdo aylanmasiga tushish kanallarini yopishga qaratilgani aytiladi. O‘tgan yilning o‘zida ushbu yo‘nalishda 6648 ta jinoiy holatlar aniqlandi. Shuningdek, tarkibida narkotik bo‘lgan o‘simliklarni noqonuniy yetishtirish holatlariga chek qo‘yish maqsadida olib borilgan “Qora ko‘knor — 2015” operatsiyasi chog‘ida 2687 ta narkotik jinoyatlar aniqlandi va 621 kg narkotik vositalar musodara qilindi.
Izoh (0)