“Sport” telekanali 17:00 da boshlanadigan Toshkent derbisini yarim tunda namoyish etadi
12-may kuni futbol bo‘yicha O‘zbekiston Oliy Ligasining 9-tur bellashuvlari “Lokomotiv” va “Paxtakor” klublari o‘rtasidagi Toshkent derbisi bilan start oladi. Yana 6 ta o‘yin 14-may kuni bo‘lib o‘tsa, 9-tur 16-may kungi “Metallurg” — “Nasaf” o‘yini bilan yakun topadi.
Keyinroq PFL mazkur uchrashuvni 12-may sanasiga ko‘chirdi. Tashkilot rasmiy sayti buni “Lokomotiv” klubining Osiyo Chempionlar Ligasi pley-off uchrashuvlariga jiddiy tayyorgarlik ko‘rishini ta’minlash maqsadida, deb izohladi. Qayd etish kerak, PFL reglamentida o‘yinlar sanasining ehtimoliy o‘zgarishi mumkinligi haqida alohida band bor. Biroq tashkilot taqvim tuzayotganida Osiyo Chempionlar Ligasida ishtirok etuvchi “Lokomotiv” va “Paxtakor” klubilari guruh bosqichini muvaffaqiyatli yakunlashi mumkinligini inobatga olgan yoki yo‘qligi haqida ma’lumot mavjud emas.
17-may kuni “Lokomotiv” Osiyo Chempionlar Ligasining 1/8 finali dastlabki uchrashuvini Saudiya Arabistonida “Al-Hilol” klubiga qarshi o‘tkazadi. Mazkur o‘yin sanasi va joyi “Lokomotiv” “A” guruhini 1-o‘rinda yakunlagan 4-may kunida ma’lum bo‘lib ulgurgandi.
“Daryo”ning aniqlashicha, “Sport” telekanali ko‘rsatuvlar jadvaliga katta o‘zgartirish kiritmaydi va “Lokomotiv” — “Paxtakor” to‘qnashuvini 12-maydan 13-mayga o‘tar kechasi soat 00:05 da efirga uzatadi. MTRK rasmiy saytidagi ko‘rsatuvlar jadvalida bu vaqtda 17 yoshgacha bo‘lgan futbolchilar o‘rtasidagi Yevropa Chempionati o‘yinlaridan biri olib berilishi ko‘rsatib o‘tilgan.
