Aktyor Javohir Zokirov qarindosh opasi Nargiz Zokirova bilan tez-tez suhbatlashib turishini ma’lum qildi. Bu haqda u “Hordiq” gazetasiga bergan intervyusida aytib o‘tdi.
“Nargiz Zokirova bilan oxirgi yillarda kam ko‘rishgan bo‘lsak-da, telefonda ko‘p suhbat quramiz. Opam bilan biz qarama-qarshi dunyoqarash egalarimiz”, — dedi aktyor.
“Uning san’atga bo‘lgan fikrlari tamoman o‘zgacha, menikidan farq qiladi. Lekin oxirgi chiqqan filmlarim haqida undan iliq fikrlar eshitdim”, — deya qo‘shimcha qildi Javohir Zokirov.
Nargiz Zokirova — 1938-yilda tug‘ilgan Luiza Zokirovaning qizi, Javohir Zokirov 1949-yilda tug‘ilgan Jamshid Zokirovning o‘g‘li. Luiza va Jamshid Zokirovlar O‘zbekiston xalq artisti Karim Zokirovning farzandlaridir.
Ma’lumot uchun, Javohir Zokirov so‘nggi vaqtlarda “O‘zbekkino” milliy agentligi buyurtmasiga asosan suratga olingan “Sotqin” va “Baron” filmlarida suratga tushgan edi.
Izoh (0)