Pan Gi Mun: Yil oxiriga qadar yana 20 ta davlat iqlim bo‘yicha Parij kelishuvini ratifikatsiya qiladi

Joriy yil oxiriga qadar kamida 20 davlat iqlim bo‘yicha Parij kelishuvini ratifikatsiya qilishni va’da qildi. Hujjat imzolanish uchun ochilgan 22-aprelda uni 15 mamlakat, jumladan, Falastin va Somali ratifikatsiya etishga ulgurdi. Bu haqda BMT bosh kotibi Pan Gi Mun ma’lum qildi, deya xabar beradi “TASS”.

“Biz Qo‘shma Shtatlar, Kanada, Meksika, Argentina va boshqa ko‘plab, kamida 20 davlatdan kelishuvga yil yakuniga qadar qo‘shilishlari haqidagi va’dalarni oldik. Hujjat kuchga kirishi uchun uni hissasiga atmosferaga chiqariladigan parnik gazlarining 55 foizi to‘g‘ri keladigan 55 ta mamlakat ratifikatsiya qilishi lozim”, — deya ta’kidlagan Vashingtondagi iqlim bo‘yicha forum matbuot anjumanidagi chiqishi chog‘ida bosh kotib.