Facebook’dagi “Voditeli Tashkenta” va “Voditeli Tashkenta (Drivers.uz)” guruhlarida so‘nggi bir necha kundan beri avtomobildan oyog‘ini chiqarib olgan haydovchi va yo‘lovchilarning suratlari paydo bo‘lmoqda. Ular nima uchun bunday qilayotgani noma’lum.
Xususan, “Voditeli Tashkenta (Drivers.uz)” guruhi a’zosi Hyundai mikroavtobusi haydovchisi gipslangan chap oyog‘ini oynadan chiqarib olgani tasvirlangan fotosuratni e’lon qilgan; gipsning uchiga esa O‘zbekiston bayrog‘i qadalganini ko‘rish mumkin. Foydalanuvchilar Hyundai haydovchisining bu harakatini keskin qoralagan.
Keyinroq “Voditeli Tashkenta” guruhida Matiz’ning oynasidan oyog‘ini osiltirib olgan yo‘lovchi suratlari paydo bo‘ldi. Bu holatni ham foydalanuvchilar qoralagan, ba’zilar buni maqtanchoqlikka yo‘ygan.
Ma’lumot uchun, Yo‘l harakati qoidalarining 11-bandiga muvofiq, transport vositasi haydovchisi yo‘lovchilarni harakat vaqtida qo‘ldan boshqa tana qismlarini salondan chiqarish taqiqlangani haqida ogohlantirishi kerak. Qoidalarning 24-bandiga ko‘ra, yo‘lovchilarning transport vositasi harakatlanayotgan vaqtda salondan tana qismlarini (qo‘ldan tashqari) chiqarishi taqiqlanadi.
Izoh (0)