Toshkent shahri chorrahalariga o‘rnatilgan kuzatuv kameralari yozib olgan yo‘l-transport hodisalarining qisqa jamlanmasi Mover videoxizmatiga joylashtirildi. Bu haqda Facebook’dagi “Voditeli Tashkenta (Drivers.uz)” guruhida xabar qoldirilgan.
Videojamlanmaga 2016-yilning 20-yanvaridan 23-martigacha bo‘lgan davrda yuz bergan qator yo‘l-transport hodisalari kiritilgan. Ular orasida, jumladan, 23-mart kuni Taras Shevchenko va Nukus ko‘chalari kesishmasida Chevrolet Captiva va Nissan Altima avtomobillari ishtirokida yuz bergan avariya ham bor.
Videoda ko‘rsatilgan yo‘l-transport hodisalari asosan ikki sabab bilan — bir guruh avariyalar qarama-qarshi qatnov qismidagi avtomobilga yo‘l bermaslik oqibatida, ikkinchi tur YTHlar esa svetoforning taqiqlovchi qizil chirog‘i talabiga bo‘ysunmay, harakatlanish natijasida sodir bo‘lgan. Ba’zi avariyalar sabab, yo‘l infratuzilmasi obyektlari — svetofor va panjaralarga zarar yetkazilgan.
Avvalroq, 2016-yilning yanvarida Toshkentdagi 100 dan ortiq katta chorrahalar videofiksatsiya vositalari bilan ta’minlangani hamda ular sinov tartibida ishga tushgani ma’lum qilingan edi. O‘zbekiston Ichki ishlar vazirligi Yo‘l harakati xavfsizligi bosh boshqarmasi matbuot xizmati rahbari muovini Mansur Rihsiyevning “Daryo”ga ma’lum qilishicha, “foto- va videofiksatsiya vositalari orqali aniqlangan qoidabuzarliklarga nisbatan jarimalar qo‘llash amaliyoti to‘liq tartibda ishga tushishidan 10 kun avval bu haqda OAV orqali jamoatchilikka axborot beriladi”.
Izoh (0)