O‘zbekiston milliy terma jamoasining sobiq bosh murabbiyi Mirjalol Qosimov Qozog‘iston klublaridan biriga ustozlik qilishi mumkin, deb xabar berdi “Sports.kz” nashri.
Xabarda keltirilishicha, 45 yoshli o‘zbekistonlik mutaxassis yaqin kelajakda Qozog‘iston klublaridan biriga boshchilik qiladi. Biroq unda klub nomi, Qosimovga rasmiy taklif bilan chiqilgan yoki yo‘qligi to‘g‘risida ma’lumot berilmagan.
Mirjalol Qosimov murabbiylik faoliyatiga 2006-yil O‘zbekiston Olimpiya Terma jamoasini boshqarish orqali kirib kelgan, deb yozadi Qozog‘iston nashri. Qayd etish kerak, 2006-yil Mirjalol Qosimov olimpiya terma jamoasida Vadim Abramovga yordam bergan.
Qosimov “Bunyodkor” bilan Osiyo Chempionlar Ligasining yarim finaliga ikki marta yetib borgan va bunday natijaga erishgan o‘zbekistonlik yagona murabbiy hisoblanadi. Shuningdek, Toshkent klubi bilan uch marta mamlakat chempionligini va ikki marta kubogini qo‘lga kiritgan.
Mirjalol Qosimovning so‘nggi ish joyi O‘zbekiston milliy terma jamoasi bo‘lib, u JCh—2018 2-saralash bosqichi doirasidagi KXDRga qarshi safar bellashuvidan so‘ng iste’foga chiqqandi.
Izoh (0)