Ўзбекистон миллий терма жамоасининг собиқ бош мураббийи Миржалол Қосимов Қозоғистон клубларидан бирига устозлик қилиши мумкин, деб хабар берди «Sports.kz» нашри.
Хабарда келтирилишича, 45 ёшли ўзбекистонлик мутахассис яқин келажакда Қозоғистон клубларидан бирига бошчилик қилади. Бироқ унда клуб номи, Қосимовга расмий таклиф билан чиқилган ёки йўқлиги тўғрисида маълумот берилмаган.
Миржалол Қосимов мураббийлик фаолиятига 2006 йил Ўзбекистон Олимпия Терма жамоасини бошқариш орқали кириб келган, деб ёзади Қозоғистон нашри. Қайд этиш керак, 2006 йил Миржалол Қосимов олимпия терма жамоасида Вадим Абрамовга ёрдам берган.
Қосимов «Бунёдкор» билан Осиё Чемпионлар Лигасининг ярим финалига икки марта етиб борган ва бундай натижага эришган ўзбекистонлик ягона мураббий ҳисобланади. Шунингдек, Тошкент клуби билан уч марта мамлакат чемпионлигини ва икки марта кубогини қўлга киритган.
Миржалол Қосимовнинг сўнгги иш жойи Ўзбекистон миллий терма жамоаси бўлиб, у ЖЧ—2018 2-саралаш босқичи доирасидаги КХДРга қарши сафар беллашувидан сўнг истеъфога чиққанди.
Изоҳ (0)