“Tashabbusli byudjet”ning 2025-yilgi 2-mavsumida 823 ta mahallaga tanaffus berildi.
Iqtisodiyot va moliya vazirligi matbuot xizmatining ma’lum qilishicha, 2024-yilgi 2-mavsum hamda 2025-yilning 1-mavsumida (ikkita mavsumda ketma-ket) g‘olib bo‘lgan 823 ta mahallaga joriy yilgi 2-mavsum hamda 2026-yilgi 1-mavsumda tanaffus beriladi.
Mazkur mahallalar (shuningdek, ushbu mahallalarda joylashgan maktab, bog‘cha, tibbiyot muassasalari va boshqa tashkilotlar) navbatdagi ikki mavsum doirasida o‘z loyihalari bilan ishtirok eta olmaydi. Tanaffus beriladigan mahallalarning to‘liq ro‘yxati bilan quyidagi havola orqali tanishish mumkin.
G‘oliblar ro‘yxatiga aniqlik kiritilgan hollarda har mavsum boshlanishidan avval tanaffus berilayotgan mahallalar ro‘yxati Iqtisodiyot va moliya vazirligining rasmiy sahifalari hamda “Ochiq byudjet” portalida e’lon qilib boriladi.
Namangan shahar — “Dashtbog‘”, Kogon shahri — “Nurafshon” va Shumanay tumani — “Begjap” mahallalarining 2025-yil 1-mavsumdagi loyihalari rad etilgani sababli ushbu mahallalarga tanaffus berilmaydi.
“Tashabbusli byudjet”ning 2025-yilgi ikkinchi mavsumi 15-iyuldan boshlandi.
Bunda:
- loyiha kiritish bosqichi — 15-iyul–3-avgust;
- saralash bosqichi — 4–18-avgust;
- targ‘ibot bosqichi — 19–21-avgust;
- ovoz berish bosqichi — 22–31-avgust kunlari o‘tkaziladi.
G‘oliblar 1-sentyabr — Mustaqillik bayrami kuni e’lon qilinadi.
“Tashabbusli byudjet”ning 2025-yilgi birinchi mavsumi 1-fevraldan boshlanib, 20-martga qadar davom etgandi. Ovoz berish yakunlariga ko‘ra, 3,2 trillion so‘mlik 2 369 ta loyiha g‘olib deb topilgandi. Loyihalarning eng ko‘pi — 964 tasi ichki yo‘llarni ta’mirlash bilan bog‘liq tadbirlar bo‘lgan.
Izoh (0)