Asosan she’rlari bilan tanilgan Ahad Qayum rejissorlikka qo‘l urib, “Ona” nomli film suratga olmoqda. Jurnalist Feruz Muhammad ushbu film haqida batafsil axborot olish maqsadida Ahad Qayum bilan muloqotda bo‘ldi.
— Film orqali tomoshabinga nima demoqchisiz?— She’riyatdagi yo‘nalishim kabi filmning yo‘nalishi ham tarbiyaga chorlashdir. Film orqali onalarimizga: “Farzand tarbiyasiga ahamiyat bering va yaxshi tarbiya bering”, demoqchiman. Farzandlarga esa: “Ota-ona g‘animat, ko‘zingizni oching, ayriliq muqarrar, ularni bu hayotga bog‘lab bermagan”, degan fikrni yetkazmoqchiman.
— Bugun kinossenariylarning sayozligi asosli tanqidlarga sabab bo‘lmoqda. Siz suratga olayotgan film ssenariysi kimga tegishli?— Ssenariy Feruza Fattohova hamda Saida Vahobovaga tegishli. Tasvirga olish ishlari aprel oxirida yakuniga yetadi. Bu yil, nasib qilsa, onam 50 yoshga to‘ladi. Mazkur filmni onamning tug‘ilgan kuniga sovg‘a qilmoqchiman.
— Shoir, boshlovchi, dizayner, prodyuser, aktyor, xullas, Ahad Qayum endi rejissor ham bo‘ldimi, degan gap-so‘zlar bo‘lishi tabiiy. Kinodan, rejissuradan qanchalik xabardorsiz?— 12 yildan buyon kino ichidaman, ko‘plab filmlarda yordamchi rejissor, yordamchi prodyuser sifatida qatnashgan. Yuzlab filmlarning s’yomkalarida qatnashdim, mustaqil ravishda bir qancha kliplar, qisqa metrajli filmlarni suratga oldim. Hech bir film haqida oldindan: “Bu shedevr bo‘ladi”, deb aytib bo‘lmaydi, ammo men kino olishning qonun-qoidasini, yo‘lini rejissorlarimiz darajasida bilaman, deb o‘ylayman.
— Aktyorlar jamoasi kimlardan tarkib topgan?— Mazkur film yetti onaning taqdiri haqida, unda rollarni Saida Rametova, Erkin Komilov, Tesha Mo‘minov singari 20 dan ortiq mashhur aktyor-aktrisalarimiz ijro etmoqda.
— Yetti onaning taqdirini qaysi aktrisalar ochib beradi?— Muxlislarimiz yetti onaning rollarini kimlar ijro etganini premeradan so‘ng bilgani ma’qul. Aktrisalarimizning o‘zi: “Bu sir bo‘la tursin”, deb iltimos qilgan.
Izoh (0)