Асосан шеърлари билан танилган Аҳад Қаюм режиссёрликка қўл уриб, «Она» номли фильм суратга олмоқда. Журналист Феруз Муҳаммад ушбу фильм ҳақида батафсил ахборот олиш мақсадида Аҳад Қаюм билан мулоқотда бўлди.
— Фильм орқали томошабинга нима демоқчисиз?— Шеъриятдаги йўналишим каби фильмнинг йўналиши ҳам тарбияга чорлашдир. Фильм орқали оналаримизга: «Фарзанд тарбиясига аҳамият беринг ва яхши тарбия беринг», демоқчиман. Фарзандларга эса: «Ота-она ғанимат, кўзингизни очинг, айрилиқ муқаррар, уларни бу ҳаётга боғлаб бермаган», деган фикрни етказмоқчиман.
— Бугун киносценарийларнинг саёзлиги асосли танқидларга сабаб бўлмоқда. Сиз суратга олаётган фильм сценарийси кимга тегишли?— Сценарий Феруза Фаттоҳова ҳамда Саида Ваҳобовага тегишли. Тасвирга олиш ишлари апрель охирида якунига етади. Бу йил, насиб қилса, онам 50 ёшга тўлади. Мазкур фильмни онамнинг туғилган кунига совға қилмоқчиман.
— Шоир, бошловчи, дизайнер, продюсер, актёр, хуллас, Аҳад Қаюм энди режиссёр ҳам бўлдими, деган гап-сўзлар бўлиши табиий. Кинодан, режиссурадан қанчалик хабардорсиз?— 12 йилдан буён кино ичидаман, кўплаб фильмларда ёрдамчи режиссёр, ёрдамчи продюсер сифатида қатнашган. Юзлаб фильмларнинг с’ёмкаларида қатнашдим, мустақил равишда бир қанча клиплар, қисқа метражли фильмларни суратга олдим. Ҳеч бир фильм ҳақида олдиндан: «Бу шедевр бўлади», деб айтиб бўлмайди, аммо мен кино олишнинг қонун-қоидасини, йўлини режиссёрларимиз даражасида биламан, деб ўйлайман.
— Актёрлар жамоаси кимлардан таркиб топган?— Мазкур фильм етти онанинг тақдири ҳақида, унда ролларни Саида Раметова, Эркин Комилов, Теша Мўминов сингари 20 дан ортиқ машҳур актёр-актрисаларимиз ижро этмоқда.
— Етти онанинг тақдирини қайси актрисалар очиб беради?— Мухлисларимиз етти онанинг ролларини кимлар ижро этганини премерадан сўнг билгани маъқул. Актрисаларимизнинг ўзи: «Бу сир бўла турсин», деб илтимос қилган.
Изоҳ (0)