2016-yilning 15-sentabridan 2-oktabrigacha Hindistonda bo‘lib o‘tadigan Osiyo chempionatiga tayyorgarlik ko‘rayotgan O‘zbekiston o‘smirlar (U-16) terma jamoasi kecha, 13-aprel kuni Toshkentda Polsha o‘smirlar termasiga qarshi o‘rtoqlik uchrashuvi o‘tkazib, 1:2 hisobida mag‘lub bo‘ldi. Bu haqda O‘zbekiston futbol federatsiyasi matbuot xizmati xabar bermoqda.
O‘yin Temur Olimxo‘jayev boshchiligidagi O‘zbekiston U-16 terma jamoasi ustunligida o‘tdi. Birinchi bo‘limda o‘zbekistonliklar gol urish uchun bir necha qulay vaziyatlarga ega bo‘ldi. Shunday xavfli hujumlarning biri 12-daqiqada amalga oshirildi. Oston O‘runov uzoq masofaga aniq to‘p uzatishini amalga oshirdi va Asad Sobirjonovni to‘p bilan ta’minladi. U qanotdan kirib borib, jarima maydoni ichidagi Ibrohim G‘anixonovga to‘pni uzatdi. Ibrohim aniq zarba yo‘llab, hisobni ochdi – 1:0.
Birinchi bo‘lim o‘rtalariga kelib O‘zbekiston o‘smirlar terma jamoasi yarim himoyachisi Bahrom Soatov ikkinchi sariq kartochka olib, maydondan chetlatildi.
Ikkinchi bo‘limda Polsha o‘smirlar terma jamoasi hujumda ancha faol harakat qila boshladi. Hujumlardan birida jarima maydoni ichida o‘zbekistonlik himoyachi qo‘pollik ishlatdi deb topildi va Jasurbek Umrzoqov qo‘riqlagan darvoza tomon penalti belgilandi. 11 metrlik jarima zarbasini Matuyesh Praszenik aniq amalga oshirib, hisobni tenglashtirdi – 1:1.
O‘yinning asosiy vaqtiga qo‘shib berilgan daqiqalar o‘tib borayotgan bir pallada Polsha o‘zining so‘nggi hujumini tashkil etdi va uni muvaffaqiyatli yakunlay oldi. Golga Bartlomey Kukulovich mualliflik qildi – 1:2.
Ma’lumot uchun, O‘zbekiston U-16 termasi Polshaga qarshi ikkinchi nazorat o‘yinini 15-aprel, juma kuni o‘tkazadi. Uchrashuv “Jar” stadionida, 16:00 da boshlanishi rejalashtirilgan.
O‘rtoqlik uchrashuvi
13-aprel, chorshanba. “Jar” stadioni
O‘zbekiston U-16 — Polsha U-16 1:2
Gollar: Ibrohim G‘anixonov (12) – Matuyesh Praszenik (74 – penalti), Bartlomey Kukulovich (90+4).O‘zbekiston U-16: Jasurbek Umrzoqov, Ixtiyor Xoldorov, Abubakir Mo‘ydinov, Oston O‘runov, Bahrom Soatov, Rasul Yo‘ldoshev, Asadbek Sobirjonov, Ibrohim G‘anixonov, Islom Karimov, Shuhrat Ne’matov.
Zaxira: Abduvohid Ne’matov, Muhammadali Nomozov, Shohzamon Xayrullayev, G‘ayrat Azizxo‘jayev, Abdug‘ani Kamolov, Abdunozir Abdurahmonov, Doniyor Abdumannonov, Ohun Sayfuddinov, Abduqodir Parpiyev, Humoyun Abdusattorov.
Polsha U-16: Bartosh Mrozek, Marsin Grabovski, Simon Zalevski, Kasper Laskosh, Mateush Skrzipchak, Timoteush Klyupsh, Przemishlav Bargiyel, Kasper Velniak, Mixal Skorash, Blazey Starziski, Sebastyan Valukiyevich.
Zaxira: Pavel Sokol, Matuyesh Praszenik, Kasper Tabis, Javib Kivor, Marsel Stefanek, Xubert Sobol, Bartlomey Kukulovich.
Izoh (0)