2016 йилнинг 15 сентябридан 2 октябригача Ҳиндистонда бўлиб ўтадиган Осиё чемпионатига тайёргарлик кўраётган Ўзбекистон ўсмирлар (U-16) терма жамоаси кеча, 13 апрель куни Тошкентда Польша ўсмирлар термасига қарши ўртоқлик учрашуви ўтказиб, 1:2 ҳисобида мағлуб бўлди. Бу ҳақда Ўзбекистон футбол федерацияси матбуот хизмати хабар бермоқда.
Ўйин Темур Олимхўжаев бошчилигидаги Ўзбекистон U-16 терма жамоаси устунлигида ўтди. Биринчи бўлимда ўзбекистонликлар гол уриш учун бир неча қулай вазиятларга эга бўлди. Шундай хавфли ҳужумларнинг бири 12-дақиқада амалга оширилди. Остон Ўрунов узоқ масофага аниқ тўп узатишини амалга оширди ва Асад Собиржоновни тўп билан таъминлади. У қанотдан кириб бориб, жарима майдони ичидаги Иброҳим Ғанихоновга тўпни узатди. Иброҳим аниқ зарба йўллаб, ҳисобни очди – 1:0.
Биринчи бўлим ўрталарига келиб Ўзбекистон ўсмирлар терма жамоаси ярим ҳимоячиси Баҳром Соатов иккинчи сариқ карточка олиб, майдондан четлатилди.
Иккинчи бўлимда Польша ўсмирлар терма жамоаси ҳужумда анча фаол ҳаракат қила бошлади. Ҳужумлардан бирида жарима майдони ичида ўзбекистонлик ҳимоячи қўполлик ишлатди деб топилди ва Жасурбек Умрзоқов қўриқлаган дарвоза томон пенальти белгиланди. 11 метрлик жарима зарбасини Матуеш Прасзеник аниқ амалга ошириб, ҳисобни тенглаштирди – 1:1.
Ўйиннинг асосий вақтига қўшиб берилган дақиқалар ўтиб бораётган бир паллада Польша ўзининг сўнгги ҳужумини ташкил этди ва уни муваффақиятли якунлай олди. Голга Бартломей Кукулович муаллифлик қилди – 1:2.
Маълумот учун, Ўзбекистон U-16 термаси Польшага қарши иккинчи назорат ўйинини 15 апрель, жума куни ўтказади. Учрашув «Жар» стадионида, 16:00 да бошланиши режалаштирилган.
Ўртоқлик учрашуви
13 апрель, чоршанба. «Жар» стадиони
Ўзбекистон U-16 — Польша U-16 1:2
Голлар: Иброҳим Ғанихонов (12) – Матуеш Прасзеник (74 – пенальти), Бартломей Кукулович (90+4).Ўзбекистон U-16: Жасурбек Умрзоқов, Ихтиёр Холдоров, Абубакир Мўйдинов, Остон Ўрунов, Баҳром Соатов, Расул Йўлдошев, Асадбек Собиржонов, Иброҳим Ғанихонов, Ислом Каримов, Шуҳрат Неъматов.
Захира: Абдувоҳид Неъматов, Муҳаммадали Номозов, Шоҳзамон Хайруллаев, Ғайрат Азизхўжаев, Абдуғани Камолов, Абдунозир Абдураҳмонов, Дониёр Абдуманнонов, Оҳун Сайфуддинов, Абдуқодир Парпиев, Ҳумоюн Абдусатторов.
Польша U-16: Бартош Мрозек, Марсин Грабовски, Симон Залевски, Каспер Ласкош, Матеуш Скрзипчак, Тимотеуш Клюпш, Прземишлав Баргиел, Каспер Велниак, Михал Скораш, Блазей Старзиски, Себастьян Валукиевич.
Захира: Павел Сокол, Матуеш Прасзеник, Каспер Табис, Жавиб Кивор, Марсел Стефанек, Хуберт Собол, Бартломей Кукулович.
Изоҳ (0)