Toshkentdagi Nurafshon ko‘chasi Beruniy ko‘chasi bilan kesishmadan Uyg‘ur ko‘chasiga va undan Chilonzor-Oqtepa maydoniga uzaytiriladi. Bu haqda, Toshkent shahar hokimligi axborot xizmati rahbari Husan Ermatovning xabar berishicha, shahar hokimi Rahmonbek Usmonov ma’lum qilgan.
“Bu esa ushbu oraliqdagi bo‘sh turgan maydon va ko‘chalar hamda bir qator aholi xonadonlarining buzilishi hisobidan amalga oshiriladi. Uylari buzilishga tushadigan xonadon egalari o‘z vaqtida bu haqida ogohlantirilgan va ularning huquqlari ta’minlanishi kafolatlangan”, — deydi Husan Ermatov.
Ushbu yo‘lning Oqtepaga tutashishi natijasida mazkur maydondagi ko‘prikka tushadigan yuklama ortadi, shu sababdan mazkur yo‘l o‘tkazish nuqtasida ham rekonstruksiya ishlari amalga oshiriladi. Bu yo‘l Muqimiy ko‘chasi bo‘ylab davom etib, Shota Rustaveli ko‘chasi bilan kesishadi va bu yerda ham yo‘l o‘tkazgich quriladi.
“Poytaxt yo‘llaridagi shu va yana bir qator qurilish va yo‘llarning uzaytirilishi natijasida yangi — uchinchi halqa yo‘li paydo bo‘ladi. Bu esa shahrimiz markazidagi transport harakatini anchagina maromga keltirishi kutilmoqda”, — deydi Husan Ermatov.
Izoh (0)