Toshkent shahrida 802 ta tramvay bo‘lgani haqidagi xabarlar haqiqatga mos emas. Bu haqda Toshkent shahar hokimligi axborot xizmati rahbari Husan Ermatov ma’lum qildi.
Husan Ermatovning “Toshshahartransxizmat” kompaniyasiga asoslanib ma’lum qilishicha, shahar tramvay parkida jami 87 (sakson yetti)ta tramvay mavjud bo‘lib, ulardan 51 tasi ishga yaroqli.
Bu tramvaylarda bir yo‘lovchiga xizmat ko‘rsatish tannarxi 2864 so‘mni tashkil etgan. “Tramvaylarning o‘rniga avtobuslarning qo‘yilishi bilan xarajatlar va daromadlar balansiga erishish kutilmoqda”, — deydi hokimlik axborot xizmati rahbari.
Avvalroq bir qator internet-nashrlarda shahar tramvay parkida 802 tramvay borligi, ulardan 752 tasi ishga yaroqli ekani va ular, Toshkentda barcha tramvay yo‘nalishlari yopilishi munosabati bilan, xorij mamlakatlariga sotilishi haqida xabarlar paydo bo‘lgandi.
Izoh (0)