BAAning Dubay shahri yengil atletika bo‘yicha jismoniy imkoniyati cheklangan sportchilar o‘rtasidagi Gran-pri turniriga mezbonlik qilmoqda. “Gazeta.uz” xabariga ko‘ra, unda ishtirok etayotgan o‘zbekistonlik sportchilar 3 ta oltin medalni qo‘lga kiritdi.
O‘zbekiston milliy paralimpiya qo‘mitasi matbuot xizmati xabariga ko‘ra, Ma’rufjon Murodullayev 1,5 ming metr masofaga yugurish bo‘yicha 4 daqiqa 3 soniyalik natija ko‘rsatib, Osiyo rekordini yangiladi va Gran-pri oltin medaliga sazovor bo‘ldi.
100 metrga yugurish bahslarida esa 11,30 soniya natija ko‘rsatgan Mansur Abdurashidovga teng keladigan sportchi topilmadi.
O‘zbekiston delegatsiyasiga uchinchi oltin medalni nayza uloqtirish bo‘yicha Nozimaxon Qayumova olib berdi. Sportchi nayzani 42,79 metrga uloqtirib, raqiblarini ortda qoldirdi.
Paralimpiya o‘yinlariga litsenziya beruvchi Gran-pri musobaqasida 50 mamlakatdan 600 nafar sportchi ishtirok etmoqda. O‘zbekiston delegatsiyasi safida 10 ta yengi atletikachi Dubayda bo‘lib turibdi.
Izoh (0)