Yevropa futbol ittifoqi (UEFA) shtab-kvartirasi joylashgan Shveysariyaning Nyon shahrida 18-mart, juma kuni Chempionlar Ligasining chorak final bosqichiga qur’a tashlash marosimi bo‘lib o‘tadi. Marosim UzReport telekanali orqali to‘g‘ridan-to‘g‘ri translyatsiya qilinadi, deb xabar beradi UzReport.
16-mart kuni bo‘lib o‘tgan o‘yinlar natijasiga ko‘ra, chorak finalning barcha ishtirokchilari nomi ma’lum bo‘ldi. Unga ko‘ra, Ispaniyaning 3, Germaniyaning 2, Fransiya, Portugaliya va Angliyaning 1 ta jamoasi chorak finalga yo‘llanma oldi. Bular: “Barselona”, “Bavariya”, “Real Madrid”, “Atletiko Madrid”, “Manchester Siti”, “PSJ”, “Volfsburg” hamda “Benfika”.
18-mart, juma kuni Toshkent vaqti bilan soat 16:00 da boshlanadigan qur’a tashlash marosimida ishtirokchi klublar savatchalarga ajratilmaydi. Chorak finalning 5–6-aprel kunlari bo‘lib o‘tadigan dastlabki uchrashuvlari savatchadan birinchi bo‘lib olingan jamoa maydonida kechadi.
Izoh (0)