Rossiya sport rahbarlari mahalliy sportchilarni taqiqlangan dorilar ro‘yxatiga qo‘shimchalar kiritilgani to‘g‘risida vaqtida xabardor qilmagan. Bu haqda Rossiya prezidenti Vladimir Putin ma’lum qildi, deya xabar beradi “RIA Novosti”.
“Sport uchun javobgar mutasaddilarimiz masalaning dolzarb ekanligini tushunib yetmagan, xalqaro tizimlar ko‘rsatmasiga ko‘ra tegishli ro‘yxatlarga o‘zgartirish kiritmagan, Butundunyo aksildoping agentligining (WADA) ayrim dorilarni man etish haqidagi qarori haqida sportchilar, murabbiylar va boshqa mutaxassislarni o‘z vaqtida ogohlantirmagan”, — deya ta’kidlagan Putin hukumat a’zolari bilan uchrashuv chog‘ida.
Putin, shuningdek, aksildoping siyosatini belgilaydigan Rossiya sport vazirligi va mamlakat terma jamoalarining tibbiy-biologik ta’minoti uchun javob beradigan federal agentlik o‘rtasida o‘zaro hamkorlik yo‘qligini tanqid ostiga oldi.
Eslatib o‘tamiz, WADA 2016-yil 1-yanvardan rasman taqiqlagan meldoniy qabul qilgani uchun ko‘plab rossiyalik sportchilar, jumladan, tennischi Mariya Sharapova, figurali uchish ustasi Yekaterina Bobrova, konkida yuguruvchi Pavel Kulijnikov, short-trekchi Semyon Yelistratov musobaqalardan chetlatildi.
Izoh (0)