Xitoy sudlari 2015-yil davomida korrupsiya bo‘yicha 34 ming ishni ko‘rib chiqqan bo‘lib, ularda 49 ming amaldor aybdor sifatida ko‘rsatilgan. Shulardan 134 kishi provinsial hukumat boshqarma rahbari darajasidagi mansablarni egallab kelganlardir, deb xabar beradi “TASS”.
Bu ma’lumotni XXR Oliy xalq sudi rahbari Chjou Syan Butunxitoy xalq vakillari yillik sessiyasida qilgan chiqishi chog‘ida berdi.
Shuningdek, u hisobot davrida 1,1 million jinoiy ish bo‘yicha hukmlar chiqarilganini, bu 2014-yil ko‘rsatkichlaridan 7,5 foizga ko‘pligini ta’kidlab o‘tdi. Jinoiy ishlar bo‘yicha sudlanganlar soni 2015-yilda 1,23 million kishini tashkil qilgan bo‘lib, bu 2014-yilga nisbatan 4 foizga ko‘proqdir.
2015-yilda Xitoyda sodir etilgan qotillik, qurolli talonchilik, o‘t qo‘yish singari og‘ir jinoyatlar soni 262 mingtani, noqonuniy narkotik savdosi bilan bog‘liq jinoyatlar soni 139 mingtani tashkil qildi. Ayollar va bolalar savdosi bilan bog‘liq tugallangan ishlar soni 5,5 mingtadan iborat bo‘ldi. Kiberjinoyatlar bo‘yicha 6,2 ming kishi sudlandi.
Ikkinchi Jahon urushidagi g‘alabaning 70 yilligi munosabati bilan 2015-yilda Xitoyda 31,5 mingdan ortiq kishi amnistiya qarori bo‘yicha ozod qilindi.
Izoh (0)