Хитой судлари 2015 йил давомида коррупция бўйича 34 минг ишни кўриб чиққан бўлиб, уларда 49 минг амалдор айбдор сифатида кўрсатилган. Шулардан 134 киши провинциал ҳукумат бошқарма раҳбари даражасидаги мансабларни эгаллаб келганлардир, деб хабар беради «ТАСС».
Бу маълумотни ХХР Олий халқ суди раҳбари Чжоу Цян Бутунхитой халқ вакиллари йиллик сессиясида қилган чиқиши чоғида берди.
Шунингдек, у ҳисобот даврида 1,1 миллион жиноий иш бўйича ҳукмлар чиқарилганини, бу 2014 йил кўрсаткичларидан 7,5 фоизга кўплигини таъкидлаб ўтди. Жиноий ишлар бўйича судланганлар сони 2015 йилда 1,23 миллион кишини ташкил қилган бўлиб, бу 2014 йилга нисбатан 4 фоизга кўпроқдир.
2015 йилда Хитойда содир этилган қотиллик, қуролли талончилик, ўт қўйиш сингари оғир жиноятлар сони 262 мингтани, ноқонуний наркотик савдоси билан боғлиқ жиноятлар сони 139 мингтани ташкил қилди. Аёллар ва болалар савдоси билан боғлиқ тугалланган ишлар сони 5,5 мингтадан иборат бўлди. Кибержиноятлар бўйича 6,2 минг киши судланди.
Иккинчи Жаҳон урушидаги ғалабанинг 70 йиллиги муносабати билан 2015 йилда Хитойда 31,5 мингдан ортиқ киши амнистия қарори бўйича озод қилинди.
Изоҳ (0)