Yevropa Jeneva motorshousiga tayyorgarlik ko‘rar ekan, AQShdagi tyuning-atelyelar ikki taniqli avtomobil rusumiga qayta ishlov berdi. Bu haqda “Carzone.uz” xabar bermoqda.
Callaway atelyesi 16955 dollarga Chevrolet Camaro mashinasini binoyidek sport avtomobiliga aylantirdi. Mashinaga Callaway Camaro SC610 nomi berildi, SC610 qo‘shimchasi 610 otning kuchi borligini bildiradi.
Kupe kuzovli avtomobillar bilan bir qatorda kabrioletlarga ham qayta ishlov berish mumkin. Xohlovchilar Chevrolet Camaro’ni tyuning-atelyega keltirib buyurtma berishadi, shuningdek, tayyor ishlov berilgan mashinani sotib olish imkoni bor.
Hennessey Performance tyuning-atelyesi 707 ot kuchiga ega Dodge Challenger SRT Hellcat avtomobilini haqiqiy giperkarga aylantirdi. 6,4 litrli kompressorli V8 dvigatel kuchaytirildi, gazlarni chiqarish tizimi o‘zgardi, sport mashinalaridagidek havo filtrlari o‘rnatildi, sovutish tizimi takomillashirildi va dvigatel boshqaruv bloki qayta dasturlandi. Motor quvvati 707 ot kuchidan 1032 ot kuchiga oshdi. Ammo ishlov beruvchi mutaxassislar bu gal xizmat bahosini oshkor etmaslikni ma’qul topdi.
Izoh (0)