2016-yil 16-yanvar kuni Markaziy bank raisi F.Mullajonov “Tijorat banklari tomonidan kasb-hunar kollejlari bitiruvchilariga mikrokreditlar berish tartibi to‘g‘risidagi nizomni tasdiqlash haqida”gi qaror (pdf)ga imzo chekdi. Bu haqda huquqshunos Xushnudbek Xudayberdiyev o‘z saytida xabar bermoqda.
Qarorga ko‘ra, tadbirkorlik faoliyatini amalga oshirish uchun davlat ro‘yxatidan o‘tgan yoki yuridik shaxs ustav fondida (ustav kapitalida) 50 foiz yoki undan ortiq aksiyaga (ulushga) ega bo‘lgan O‘zbekiston Respublikasi kasb-hunar kollejlarida o‘qishni yakunlagan kunidan boshlab 3 yildan ortiq vaqt o‘tmagan bitiruvchilar kreditlash subyektlari hisoblanadi.
Mikrokredit:
— yuridik shaxs tashkil etmagan holda faoliyat yuritayotgan qarz oluvchilarga — eng kam oylik ish haqining 200 baravarigacha (26 mln. 048 ming so‘m);— yuridik shaxs tashkil etgan holda faoliyat yuritayotgan qarz oluvchilarga — eng kam oylik ish haqining 300 baravarigacha miqdorda qaytarish muddatini uzaytirish huquqisiz beriladi (39 mln. 072 ming so‘m).
Mikrokredit qarz oluvchiga kredit ajratilayotgan loyihaning o‘zini-o‘zi qoplashi hisobga olingan holda:
— faoliyatni boshlash uchun aylanma mablag‘larni shakllantirishga, investitsiya loyihasining texnik-iqtisodiy asosini ishlab chiqishga — 12 oy muddatgacha;— qishloq xo‘jaligi mahsulotlarini yetishtirish va qayta ishlashni tashkil etish uchun aylanma mablag‘larini to‘ldirishga, shuningdek asbob-uskunalarni sotib olishga — 2 yil muddatgacha;— investitsiya loyihalarini moliyalashtirish uchun — 3 yildan ortiq muddatga beriladi.
Mikrokreditlar qarz oluvchilarga quyidagi maqsadlar uchun beriladi:— urug‘liklar, mineral o‘g‘itlar va o‘simliklarni kimyoviy himoya qilish vositalarini sotib olish, chorvachilik, quyon boqish, parrandachilik, baliqchilik va asalarichilikni rivojlantirish, qishloq xo‘jaligi mahsulotlarini yetishtirish va qayta ishlash bo‘yicha ko‘rsatiladigan texnik xizmatlar uchun to‘lovlarni amalga oshirish;— yengil konstruksiyali va muqobil yoqilg‘i manbalari hisobiga ishlaydigan issiqxonalarni qurish, meva-sabzavotchilikda ishlatiladigan qishloq xo‘jalik texnikalari va mexanizmlarini sotib olish;— bevosita ishlab chiqarish sohasi — mahsulotlar ishlab chiqarish, xom ashyo va materiallarni tubdan qayta ishlash, hunarmandchilikni rivojlantirish, kasanachilik mehnatini tashkil etish, binokorlik materiallari ishlab chiqarish va qurish;— xizmatlar ko‘rsatish va servis sohasini rivojlantirish — aholiga maishiy, tibbiy, sayyohlik-ekskursiya va mehmonxona xizmati ko‘rsatish, avtomobillar va boshqa texnikalarni ta’mirlash bo‘yicha xizmat ko‘rsatish, transport xizmati ko‘rsatishni rivojlantirish;— yangi bog‘ va tokzorlarni barpo etish, ilg‘or zamonaviy texnologiyalarni, shu jumladan tomchilatib sug‘orish texnologiyalarini joriy etish.
Mikrokreditdan foydalanganlik uchun foiz stavkasi miqdori Markaziy bankning qayta moliyalash stavkasi darajasidan yuqori bo‘lmagan miqdorda, bankning imtiyozli kreditlash jamg‘armasi hisobidan mikrokredit ajratilgan taqdirda Markaziy bankning qayta moliyalash stavkasining 50 foizi miqdorida belgilanadi.
Mikrokredit qarz oluvchiga naqd pulsiz shaklda pul o‘tkazish yo‘li bilan beriladi.
Izoh (0)