Yevropada 10 ming voyaga yetmagan qochoq g‘oyib bo‘ldi

Yevropa hukumatiga yaqin vaqt ichida ushbu hududga yetib kelgan o‘n mingga yaqin voyaga yetmagan qochoqning joylashgan joyi haqida hech narsa ma’lum emas. Bu haqda Yevropa Ittifoqi politsiya xizmati (Europol) ma’lumotiga tayanib, Meduza xabar beradi.

Bolalarning g‘oyib bo‘lishi ularning barchasi halok bo‘lganligi yoki jinoyatchilar qo‘liga tushganligini anglatmaydi. Ularning ba’zilari qarindoshlarinikiga yetib olgan bo‘lishi yoki ularni boshqa oilalar o‘zlariga olgan bo‘lishi mumkin. Europol faqat ularning taqdiri haqida hech narsa ma’lum emasligini xabar qilmoqda.

Bolalarning eng ko‘p soni, ya’ni besh mingga yaqini Italiyada g‘oyib bo‘lgan. U yerga muhojirlarning Shimoliy Afrikadan qochib borayotganligi qayd etilgan. Yana ming nafar voyaga yetmagan Shvetsiyada g‘oyib bo‘lgan. Buyuk Britaniyada 2015-yilning yanvar—sentabr oylarida 340 nafar bola yo‘qolgan.

Save the Children tashkilotining ma’lumotlariga qaraganda, 2015-yilda Yevropaga 26 ming bola kattalarning kuzatuvisiz yetib kelgan.