Koreya xalqaro hamkorlik agentligi (KOICA) va “O‘zbekiston havo yo‘llari” Milliy aviakompaniyasi 25-yanvar kuni “Toshkent shahar aeroportining yangi xalqaro yo‘lovchi terminali qurilishi” (Toshkent-4) investitsiyaviy loyihasining texnik-iqtisodiy asosini ishlab chiqish bo‘yicha boshlang‘ich majlis o‘tkazdi, deya xabar bermoqda “Gazeta.uz”.
Toshkent aeroportini Markaziy Osiyoning bog‘lovchi aeroportiga aylantirish, shuningdek, mamlakat raqobatbardoshliligini oshirish maqsadida O‘zbekiston hukumati eskirgan va kichik xalqaro aeroportni (Aeroport-2) yangi xalqaro yo‘lovchi terminali bilan almashtirmoqchi. Texnik-iqtisodiy asosni ishlab chiqish KOICA’ga topshirildi.
O‘tgan yili Koreya agentligi loyihani amalga oshirish uchun Inchxon aeroporti konsorsiumini tanlagan edi. U joriy yilning yanvaridan iyuniga qadar loyiha hamda aeroportni boshqarish rejasini amalga oshirish bo‘yicha texnik-iqtisodiy hujjatlarni tayyorlaydi.
Majlisda Inchxon aeroporti boshqaruvchi menejeri Kim Dong Chyol ishlar rejasi haqida gapirib berdi va Koreya tomoni eng yaxshi natijalarga erishish uchun qo‘lidan kelgancha harakat qilishini aytdi.
Eslatib o‘tamiz, “O‘zbekiston havo yo‘llari” Milliy aviakompaniyasi 2019-yil oxirigacha Toshkent shahridagi xalqaro aeroportning yangi — “Toshkent-4” yo‘lovchi terminalini ishga tushirishni rejalashtirayotgani xabar berilgan edi.
Izoh (0)