Futbol bo‘yicha Germaniya terma jamoasi safida jahon chempioni bo‘lgan Filipp Lam Xalqaro futbol federatsiyasi (FIFA)ning eng yaxshi futbolchiga beriladigan “Oltin to‘p” mukofoti eng yaxshi hujumchini aniqlashga aylanib ketgan, deb hisoblamoqda. Bu haqda “TASS” xabar qilmoqda.
“‘Oltin to‘p’ dunyoning eng yaxshi hujumchisiga beriladigan mukofotga aylandi. Bu himoyachi sifatida mening rashkim emas, statistika bilan isbotlangan fakt. Fabio Kannavaro (2006-yil) — bu sovrinni qo‘lga kiritgan yagona himoyachi”, — dedi nemis futbolchisi.
Lamning ta’kidlashicha, mukofotni TV va ijtimoiy tarmoqlarda ko‘pincha paydo bo‘layotgan futbolchi yutmoqda.
“Balki keyingi yil nomzodlarni Facebook orqali tanlarmiz? Natija ham xuddi shunday bo‘lsa kerak. Facebook’dagi eng mashhur uch o‘yinchi — bu 108 million obunachisi bor Ronaldu, 81 obunachiga ega Messi va 54 million muxlisiga ega Neymar. Shuni darhol qayd etmoqchimanki, Ronaldu, Messi va Neymar — fantastik futbolchilar”, — dedi “Bavariya” himoyachisi.
Bundan tashqari, Lam bitta sovrin o‘rniga to‘rtta mukofot berishni taklif qildi: eng yaxshi darvozabon, eng yaxshi himoyachi, eng yaxshi yarim himoyachi va eng yaxshi hujumchiga.
Eslatib o‘tamiz, 2015-yilgi “Oltin to‘p” sovrinini “Barselona”ning argentinalik hujumchisi Lionel Messi qo‘lga kiritdi.
Izoh (0)