Qatarda 12-yanvar, seshanba kuni futbol bo‘yicha olimpiya terma jamoalari o‘rtasida (U-23) Osiyo chempionati bahslari start oldi. Musobaqani Suriya va Eron olimpiya terma jamoalari ishtirokidagi o‘yin ochib berdi.
Uchrashuvda eronlik futbolchilar 2:0 hisobida g‘alaba qozonib, musobaqadagi ilk uch ochkoni o‘z hisobiga yozib qo‘ydi. Eron olimpiya terma jamoasiga g‘alaba keltirgan gollar Arsalan Mutahhariy va Milod Muhammadiy hisobiga yozildi.
“Stadion.uz” nashri xabariga ko‘ra, mazkur uchrashuvda o‘zbekistonlik FIFA referisi Jahongir Saidov avstraliyalik bosh hakamga yordamchilik qilgan.
Musobaqa “A” guruhi 1-tur ikkinchi uchrashuvida mezbon Qatar termasi Xitoyga qarshi bahs olib boradi. O‘yin Toshkent vaqti bilan 21:30 da boshlanadi.
O‘zbekiston olimpiya terma jamoasi musobaqadagi ishtirokini 13-yanvar kuni boshlaydi. Samvel Babayan shogirdlari guruh bosqichi 1-turida Janubiy Koreyaga qarshi maydonga tushadi. O‘yin Toshkent vaqti bilan 21:30 da start oladi.
Izoh (0)