Iroq Turkiya qurolli kuchlari mamlakatning shimoliy hududidan chiqib ketishini talab qilishda davom etadi. Bu haqda Iroq bosh vaziri Haydar al-Obodiy 9-yanvar, shanba kuni Bag‘dodda mahalliy politsiya tashkil etilganiga bir yil to‘lishi munosabati bilan o‘tkazilgan parad chog‘ida ma’lum qildi, deya xabar beradi “TASS”.
“Turkiya bilan chegaradosh Suriyadagi hududda terrorizm avj olayotganida turk qurolli kuchlarini kiritilishi to‘g‘risida masala ko‘tarilmagandi. Endi bo‘lsa Turkiya qo‘shinlari terrorchilik xavfi bahonasida Iroq hududiga 100 kilometr ichkariga kirib bordi. Biz Turkiya o‘z qo‘shinlarini hududimizdan olib chiqishini talab qilamiz. Xorijiy qurolli kuchlarni chegaralarimizdan nariga surib chiqarish huquqiga egamiz va buni amalga oshirishda aslo ikkilanmaymiz”, — deya ta’kidlagan bosh vazir.
Obodiyning ma’lum qilishicha, Iroq hududi 2016-yilda terrorchilardan butkul qaytarib olinadi.
Eslatib o‘tamiz, oldinroq Turkiya prezidenti Rajab Toyyib Erdo‘g‘on Shimoliy Iroqdagi harbiy lagerga IShID uyushtirgan hujum qaytarilganini misol keltirib, turk qo‘shinlari mazkur hududga kiritilishi to‘g‘ri bo‘lganini bildirgandi.
Izoh (0)