Chustiy’s Cuisine va “Oshxona.uz” loyihalari muallifi va bosh oshpazi Bahriddin Chustiy yaqinda Samarqand Darvoza majmuasida ochilgan o‘zbekcha fast-fud — Tez Food loyihasi haqida “Vot.uz” nashriga so‘zlab berdi.
Chustiy? Kim u?
Yoshim 31 da, Namangan viloyatining Chust shahrida tug‘ilganman. Chustiy — forumlar faol bo‘lgan davrda tanlangan bir taxallus: boshqa mos niklarning bari band qilingan edi. Haqiqiy familiyam Najmiddinov.
Oilada to‘ng‘ich o‘g‘ilman. Ovqat tayyorlashga, hayotiy zarurat sabab, ancha erta kirishganman. Onam ishdan kech kelardi va uning kelishiga kechki ovqat tayyorlab qo‘yilgan bo‘lardi. Ukalarim va singillarim maktabda tanovul qilishi uchun piroglar pishirardim.
Taqdir va orzu orasida katta farq bor, deyishadi — futbolchi bo‘lishni orzu qilardim, oshpaz bo‘ldim.
Qanday qilib oshpaz bo‘lganim haqida
Sakkizinchi sinfdan ishlashni boshlaganman. Dastlab novvoyxonada ishladim, so‘ng yangi oilaviy biznes boshlandi — somsa va cheburek tayyorladik. 2007-yili Moskvaga kelib, bir restoranga ishga kirdim. Albatta, hech kim meni darrov oshxonaga ishga olmagan. Idish-tovoq yuvishdan boshlaganman: 1,5—2 oy davomida qozonlarni yuvib yurdim.Ishdan bo‘sh vaqtimda “Oshxona.uz” blogini yuritib, milliy taomlarimiz retseptlari va qanday tayyorlanishi haqida ma’lumot berib bordim. Tez-tez onamga qo‘ng‘iroq qilib, bolaligimdagi mazali taomlarning qanday tayyorlanishi, sirlari haqida so‘rab turardim.
Uzoq vaqt davomida qilayotgan ishimni o‘tkinchi deb hisoblaganman va hatto o‘zimni oshpaz deb tanishtirishga-da uyalganman.
Tez Food qanday paydo bo‘lgani haqida
O‘zbekcha fast-fudni ishga tushirish g‘oyasi menga ko‘pdan beri tinchlik bermasdi. Bir necha yildan beri yaqinlarimga shunday muassasani ishga tushirish zarurligi haqida gapirib kelardim. Samarqand Darvoza majmuasida Chustiy’s Cuisine restorani ochilganidan so‘ng, o‘zbekcha fast-fud haqiqatan ham kerakligiga to‘la amin bo‘ldim.
Restoranimizga bir oila keladi va, deylik, oila boshlig‘i — ota palov, ona norin, bolalar esa burger tanovul qilishni istaydi. Shunday bo‘ladiki, biz ularning farzandlari uchun boshqa joydan burgerlar olib kelishimiz kerak, bu esa biznes nuqtai nazaridan noto‘g‘ri yoki oila, o‘z farzandlarini burgerlar bilan quvontirish uchun, restoranimizni tark etib, burgerlar tayyorlaydigan joyga ketadi. Mana shu sababli ham biz o‘zbekcha burgerlarni tayyorladik.
Bu yerdagi o‘ziga xoslik aslida taomda ham emas, balki uni qanday taqdim etishda: palov va norin Wok’niki kabi qutilarda, ko‘hna, qadrdon kabob lavash yoki burger kabi bulochka ichida, somsa va mantilar esa xot-dogni yodga soladigan ko‘rinishda.
O‘zbekcha fast-fud retseptlari haqida
Tez Food tanlagan retseptlar — xalq retseptlari. Biz eski kitoblarga murojaat qilib, masalan, cho‘pon-kabob nomli taomni topdik. Kabob go‘sht va uning yog‘i bo‘laklaridan tayyorlanishiga o‘rganib qolganmiz, cho‘pon-kabobda esa yog‘siz butun bir go‘sht bo‘lagi pishiriladi. Aytgancha, bizning bulochkalarimiz o‘ziga xos — ularni yaqin do‘stlarimiz tayyorlab beradi.
Orzular va rejalar haqida
Umuman olganda, men o‘choq boshida turib, yangi taomlar tayyorlashim kerak, biroq so‘nggi vaqtlarda prorabga aylanib qoldim: hozirda shahar bo‘ylab bir necha ovqatlanish muassasalarini ishga tushirishga tayyorgarlik ko‘ryapmiz.Qozog‘istonning Olmaota, Ostona, Chimkent kabi shaharlarida Tez Food’ni ochish taklifi tushdi. Shanxaydan ham taklif bor. Biroq biz bu loyihani dastlab Vatanimizda sinovdan o‘tkazishimiz kerak, chunki xorijda muvaffaqiyatsizlikka uchrasak, bu har qanday ma’noda qimmatga tushadi.
Kelajakda uncha katta bo‘lmagan, 20—25 kishiga mo‘ljallangan oilaviy restoran ochib, taomlarni o‘zim tayyorlab, dasturxonga tortishni orzu qilaman.
Izoh (0)