“O‘zbekiston pochtasi” orqali yuborilgan oddiy xatlar manzilga yetib bormay, yo‘qolayotgani aniqlandi

Toshkent viloyati hududida mijozlarga ko‘rsatilayotgan universal pochta aloqasi xizmatlari sifatini oshirish maqsadida doimiy ravishda nazorat o‘tkazilmoqda, deya xabar bermoqda Aloqa, axborotlashtirish va telekommunikatsiya texnologiyalari sohasida nazorat bo‘yicha davlat inspeksiyasi matbuot xizmati.

Xususan, 2015-yil noyabr oyida Inspeksiyasining Toshkent viloyati hududiy bo‘linmasi tomonidan “O‘zbekiston pochtasi” kompaniyasi Toshkent filiali faoliyati bo‘yicha, aloqa bo‘limlari va pochta qutilari orqali buyurtmali va oddiy xatlar jo‘natilib, nazorat o‘tkazildi.

“O‘tkazilgan nazorat natijasi jo‘natilgan oddiy nazorat xatlari manzilga yetib bormasdan yo‘qolishi, aloqa bo‘limiga kelib tushgandan keyin oluvchilarga kechiktirilib yetkazilishi hamda buyurtmali xatlarni qabul qilishda “Pochta qoidalari” talablari buzilishi holatlari mavjudligini ko‘rsatdi”, — deyiladi inspeksiya axborotida.

Qayd etishlaricha, aniqlangan kamchiliklar to‘g‘risidagi ma’lumot kamchiliklarni bartaraf etish hamda tegishli choralar ko‘rish uchun “O‘zbekiston pochtasi” kompaniyasi Toshkent filialiga taqdim etilgan va bajarilishi Inspeksiyaning Toshkent viloyati hududiy bo‘linmasi tomonidan nazoratga olingan.