Chustiy’s Cuisine ва «Oshxona.uz» лойиҳалари муаллифи ва бош ошпази Баҳриддин Чустий яқинда Samarqand Darvoza мажмуасида очилган ўзбекча фаст-фуд — Tez Food лойиҳаси ҳақида “Vot.uz” нашрига сўзлаб берди.
Чустий? Ким у?
Ёшим 31 да, Наманган вилоятининг Чуст шаҳрида туғилганман. Чустий — форумлар фаол бўлган даврда танланган бир тахаллус: бошқа мос никларнинг бари банд қилинган эди. Ҳақиқий фамилиям Нажмиддинов.
Оилада тўнғич ўғилман. Овқат тайёрлашга, ҳаётий зарурат сабаб, анча эрта киришганман. Онам ишдан кеч келарди ва унинг келишига кечки овқат тайёрлаб қўйилган бўларди. Укаларим ва сингилларим мактабда тановул қилиши учун пироглар пиширардим.
Тақдир ва орзу орасида катта фарқ бор, дейишади — футболчи бўлишни орзу қилардим, ошпаз бўлдим.
Қандай қилиб ошпаз бўлганим ҳақида
Саккизинчи синфдан ишлашни бошлаганман. Дастлаб новвойхонада ишладим, сўнг янги оилавий бизнес бошланди — сомса ва чебурек тайёрладик. 2007 йили Москвага келиб, бир ресторанга ишга кирдим. Албатта, ҳеч ким мени дарров ошхонага ишга олмаган. Идиш-товоқ ювишдан бошлаганман: 1,5—2 ой давомида қозонларни ювиб юрдим.Ишдан бўш вақтимда «Oshxona.uz» блогини юритиб, миллий таомларимиз рецептлари ва қандай тайёрланиши ҳақида маълумот бериб бордим. Тез-тез онамга қўнғироқ қилиб, болалигимдаги мазали таомларнинг қандай тайёрланиши, сирлари ҳақида сўраб турардим.
Узоқ вақт давомида қилаётган ишимни ўткинчи деб ҳисоблаганман ва ҳатто ўзимни ошпаз деб таништиришга-да уялганман.
Tez Food қандай пайдо бўлгани ҳақида
Ўзбекча фаст-фудни ишга тушириш ғояси менга кўпдан бери тинчлик бермасди. Бир неча йилдан бери яқинларимга шундай муассасани ишга тушириш зарурлиги ҳақида гапириб келардим. Samarqand Darvoza мажмуасида Chustiy’s Cuisine ресторани очилганидан сўнг, ўзбекча фаст-фуд ҳақиқатан ҳам кераклигига тўла амин бўлдим.
Ресторанимизга бир оила келади ва, дейлик, оила бошлиғи — ота палов, она норин, болалар эса бургер тановул қилишни истайди. Шундай бўладики, биз уларнинг фарзандлари учун бошқа жойдан бургерлар олиб келишимиз керак, бу эса бизнес нуқтаи назаридан нотўғри ёки оила, ўз фарзандларини бургерлар билан қувонтириш учун, ресторанимизни тарк этиб, бургерлар тайёрлайдиган жойга кетади. Мана шу сабабли ҳам биз ўзбекча бургерларни тайёрладик.
Бу ердаги ўзига хослик аслида таомда ҳам эмас, балки уни қандай тақдим этишда: палов ва норин Wокъники каби қутиларда, кўҳна, қадрдон кабоб лаваш ёки бургер каби булочка ичида, сомса ва мантилар эса хот-догни ёдга соладиган кўринишда.
Ўзбекча фаст-фуд рецептлари ҳақида
Tez Food танлаган рецептлар — халқ рецептлари. Биз эски китобларга мурожаат қилиб, масалан, чўпон-кабоб номли таомни топдик. Кабоб гўшт ва унинг ёғи бўлакларидан тайёрланишига ўрганиб қолганмиз, чўпон-кабобда эса ёғсиз бутун бир гўшт бўлаги пиширилади. Айтганча, бизнинг булочкаларимиз ўзига хос — уларни яқин дўстларимиз тайёрлаб беради.
Орзулар ва режалар ҳақида
Умуман олганда, мен ўчоқ бошида туриб, янги таомлар тайёрлашим керак, бироқ сўнгги вақтларда прорабга айланиб қолдим: ҳозирда шаҳар бўйлаб бир неча овқатланиш муассасаларини ишга туширишга тайёргарлик кўряпмиз.Қозоғистоннинг Олмаота, Остона, Чимкент каби шаҳарларида Tez Food’ни очиш таклифи тушди. Шанхайдан ҳам таклиф бор. Бироқ биз бу лойиҳани дастлаб Ватанимизда синовдан ўтказишимиз керак, чунки хорижда муваффақиятсизликка учрасак, бу ҳар қандай маънода қимматга тушади.
Келажакда унча катта бўлмаган, 20—25 кишига мўлжалланган оилавий ресторан очиб, таомларни ўзим тайёрлаб, дастурхонга тортишни орзу қиламан.
Изоҳ (0)