Kreml neft kompaniyasining Chechenistonga berilishi haqidagi ma’lumotni aniqlashtirdi

“Chechennefteximprom” korxonasini Checheniston Respublikasiga berish masalasi hukumat darajasida o‘rganib chiqiladi. Bu haqda Rossiya prezidenti matbuot kotibi Dmitriy Peskov ma’lum qildi, deb yozadi “RBK”.

“Bu mavzu hukumatda o‘rganib chiqiladi. Hozircha bu savolni qo‘yishga erta”, — dedi u va vazirlar mahkamasi pozitsiyasi aniq bo‘lgachgina, “biron narsa haqida gapirish mumkin bo‘lishi”ni aytdi.

Avvalroq Vladimir Putin Checheniston rahbari Ramzan Qodirovning respublikaga uning ikkita eng yirik neft qazib chiqaruvchi aktivlaridan biri — “Chechennefteximprom”ni berib yuborish taklifini qo‘llab-quvvatlagani xabar berilgan edi. Ushbu ma’lumotni iqtisodiy rivojlanish vazirligi tasdiqladi va mazkur masala bo‘yicha hujjatlar hukumat tomonidan ko‘rib chiqilayotganini ta’kidladi.