Toshkent shahar hokimligi ko‘p qavatli uylar, mahalla va mavzelarga videokuzatuv moslamalarini o‘rnatish va ulardan foydalanish tavsiyaviy xarakterga ega ekanligini qayd etib o‘tdi. Bu haqda 23-dekabr kuni tashkil etilgan matbuot anjumanida hokimlik axborot xizmati rahbari Husan Ermatov ma’lum qildi.
“Farmoyishda ham alohida ko‘rsatib o‘tilgan — videokuzatuv moslamalarini o‘rnatish tavsiya etilyapti. Moslamalar o‘rnatiladi, biroq bularning bari fuqarolar bilan tuziladigan shartnomalar asosida amalga oshiriladi”, — dedi Husan Ermatov.
Videokuzatuv moslamalari aholi bilan kelishilgan holda, ularning talab va istaklari, ehtiyojlari, ijtimoiy muhofazaga muhtoj, kam ta’minlangan qatlamning iqtisodiy imkoniyatlarini hisobga olgan holda o‘rnatilishi rejalashtirilmoqda.
Hokimlik vakilining qo‘shimcha qilishicha, agar ko‘p qavatli uyda istiqomat qilayotgan fuqaro bu xizmatdan foydalanishni istamasa, “bu bo‘yicha ham alohida ish olib boriladi”. Ta’kidlashlaricha, videokameralarni o‘rnatish, eng avvalo, jamoat xavfsizligini ta’minlashga qaratilgan tadbirdir.
Avvalroq Toshkent shahrining olti tumanidagi ko‘p qavatli uylar, mahalla va mavzelarda namuna tariqasida videokuzatuv moslamalarini o‘rnatish va ulardan foydalanish boshlangani haqida xabar berilgan edi.
Qayd etishlaricha, moslamalarni o‘rnatish va ulardan foydalanish uchun to‘lovlar bir necha yillarga bo‘lingan holda, amalga oshiriladigan ekspluatatsiya xarajatlari to‘lovlari hajmi bilan uyg‘unlashtiriladi va, Husan Ermatovning ta’kidlashicha, “bu masalada aholining hamyoniga katta yuk tushmaydi”.
Eslatib o‘tamiz, Toshkent shahar hokimi 11-dekabr kuni “Toshkent shahridagi ko‘p qavatli turar-joylar, mahalla va mavzelarda videokuzatuv moslamalarini o‘rnatish ishlarini tashkillashtirish chora-tadbirlari to‘g‘risida”gi farmoyishni qabul qilgani haqida xabar berilgan edi.
Izoh (0)