Тошкент шаҳар ҳокимлиги кўп қаватли уйлар, маҳалла ва мавзеларга видеокузатув мосламаларини ўрнатиш ва улардан фойдаланиш тавсиявий характерга эга эканлигини қайд этиб ўтди. Бу ҳақда 23 декабрь куни ташкил этилган матбуот анжуманида ҳокимлик ахборот хизмати раҳбари Ҳусан Эрматов маълум қилди.
«Фармойишда ҳам алоҳида кўрсатиб ўтилган — видеокузатув мосламаларини ўрнатиш тавсия этиляпти. Мосламалар ўрнатилади, бироқ буларнинг бари фуқаролар билан тузиладиган шартномалар асосида амалга оширилади», — деди Ҳусан Эрматов.
Видеокузатув мосламалари аҳоли билан келишилган ҳолда, уларнинг талаб ва истаклари, эҳтиёжлари, ижтимоий муҳофазага муҳтож, кам таъминланган қатламнинг иқтисодий имкониятларини ҳисобга олган ҳолда ўрнатилиши режалаштирилмоқда.
Ҳокимлик вакилининг қўшимча қилишича, агар кўп қаватли уйда истиқомат қилаётган фуқаро бу хизматдан фойдаланишни истамаса, «бу бўйича ҳам алоҳида иш олиб борилади». Таъкидлашларича, видеокамераларни ўрнатиш, энг аввало, жамоат хавфсизлигини таъминлашга қаратилган тадбирдир.
Аввалроқ Тошкент шаҳрининг олти туманидаги кўп қаватли уйлар, маҳалла ва мавзеларда намуна тариқасида видеокузатув мосламаларини ўрнатиш ва улардан фойдаланиш бошлангани ҳақида хабар берилган эди.
Қайд этишларича, мосламаларни ўрнатиш ва улардан фойдаланиш учун тўловлар бир неча йилларга бўлинган ҳолда, амалга ошириладиган эксплуатация харажатлари тўловлари ҳажми билан уйғунлаштирилади ва, Ҳусан Эрматовнинг таъкидлашича, «бу масалада аҳолининг ҳамёнига катта юк тушмайди».
Эслатиб ўтамиз, Тошкент шаҳар ҳокими 11 декабрь куни «Тошкент шаҳридаги кўп қаватли турар-жойлар, маҳалла ва мавзеларда видеокузатув мосламаларини ўрнатиш ишларини ташкиллаштириш чора-тадбирлари тўғрисида»ги фармойишни қабул қилгани ҳақида хабар берилган эди.
Изоҳ (0)