Hindiston parlamenti zo‘ravonlik yoki qotillik kabi og‘ir jinoyatlarni sodir etishda gumonlanayotgan 16 yoshdan 18 yoshgacha bo‘lgan voyaga yetmagan jinoyatchilarni kattalar kabi sudlashga ruxsat beruvchi qonunni qabul qildi, deb yozadi Kazakhstan Today.
Bungacha ular mahalliy jinoyat kodeksiga ko‘ra, uch yilgacha ozodlikdan mahrum etilar edi. Endi esa ular bir umrlik qamoqqa yoki o‘lim jazosiga mahkum etilishi mumkin.
Qonun loyihasi parlamentning quyi palatasi tomonidan may oyida ma’qullangan edi. Qonun mamlakat prezidenti tomonidan imzolangach, kuchga kirishi kutilmoqda.
Hindistonda so‘nggi vaqtlarda voyaga yetmaganlar tomonidan amalga oshirilgan jinoyatlar soni keskin oshib ketdi. 2014-yilning o‘zidayoq ular tomonidan qotillik, zo‘rlash, zaharli kimyoviy moddalar bilan hujum qilish kabi 38 565 ta jinoyat sodir etilgan.
Izoh (0)