AQSh Milliy xavfsizlik agentligi katta ehtimol bilan Daniya fuqarolari telefon suhbatlari va internet yozishmalarini kuzatgan bo‘lishi mumkin, deya xabar bermoqda “TASS”.
Bu haqda 2009-yilda Nyu-York fond birjasi binosini portlatishni rejalashtirgan terrorchilik guruhi a’zolari ustidan AQShda bo‘lib o‘tgan sud chog‘ida jamoatchilikka oshkor etilgan MXA ichki hujjatlari guvohlik bermoqda.
Jurnalistlar qo‘liga tushgan ushbu hujjatlarda qayd etilishicha, AQSh maxsus xizmatlari islom diniga o‘tgan Daniya fuqarosi Kennet Syorensen kimlar bilan aloqa qilganini kuzatish orqali yovuz niyatlilarni topgan. 2013-yilda 30 yoshli daniyalik Suriyaga borib, ekstremistlar tomonida turib jang qilgan va o‘sha yerda o‘ldirilgan.
MXA xodimlari terrorchilar fitnasining fosh qilinishini ko‘p yillar davomida ular amalga oshirayotgan elektron josuslik dasturining samaradorligi sifatida keltirgan. Daniya uchun esa yuzaga chiqqan tekshiruv tafsilotlari yangilik bo‘lgan, chunki bu Skandinaviyadagi qirollik MXA josuslik faoliyatini olib borgan Yevropa davlatlari qatoriga kirganidan darak beruvchi birinchi dalildir.
Daniya maxsus xizmatlari hozircha ushbu ma’lumotga izoh berishdan bosh tortmoqda. Biroq muxolifatchi siyosatchilar adliya vaziriga murojaat qilib, vaziyatga oydinlik kiritishni so‘radi.
Izoh (0)