Fransiyada sun’iy yurak o‘rnatilgan uchinchi odam vafot etdi. Bu haqda bioprotez ishlab chiqargan Carmat kompaniyasi ma’lum qildi.
74 yoshli bemor 18-dekabr kuni olamdan o‘tgan. Olingan ma’lumotlarga ko‘ra, surunkali buyrak yetishmovchiligi tufayli uning nafasi to‘xtab qolgan.
Sun’iy yurak unga 8-aprelda ko‘chirib o‘tkazilgan, avgust oyining oxirida esa u uyiga qaytgandi.
Tekshiruvlar bioprotezning ishlashi bemorning o‘limiga aloqador emasligini ko‘rsatdi. Bemor bir qancha og‘ir kasalliklar bilan og‘rigan, shu jumladan buyrak yetishmovchiligidan ham.
Ilk bor Carmat yuraklarini o‘rnatish operatsiyasi 2013-yilning 18-dekabrida bo‘lib o‘tgandi. 76 yoshli erkak operatsiyadan so‘ng 75 kun yashadi. 2015-yilning may oyida esa ikkinchi bo‘lib sun’iy yurak qo‘ydirgan 69 yoshli erkak operatsiyadan 9 oy o‘tgach olamdan o‘tdi.
Izoh (0)