O‘zbekiston milliy terma jamoasining Moldovaga qarshi o‘rtoqlik o‘yini bekor qilindi

Moldova terma jamoasi O‘zbekiston bilan BAAda o‘rtoqlik uchrashuvi o‘tkazishdan bosh tortdi. Bu haqda Moldova futbol federatsiyasi vitse-prezident Ion Testemitsanu “Moldfootball.com” saytiga xabar berdi, deb yozadi “Stadion.uz”.

O‘zbekiston va Moldova terma jamoalari 9-fevral kuni Turkiyada o‘rtoqlik uchrashuvini o‘tkazishni kelishib olgan, biroq O‘FF o‘yinni BAAga ko‘chirishni so‘ragandi.

“O‘zbekiston o‘rtoqlik o‘yinini BAAda o‘tkazish taklifini bildirdi. Lekin bitta o‘rtoqlik uchrashuvi uchun u yerda yig‘in tashkil qilish bizga qimmatga tushadi. Shu bois rad javobini berdik.

Ikkinchi o‘rtoqlik o‘yini ham bekor bo‘ldi. Ruminiya ham Turkiyadagi yig‘inni bekor qilib, Ispaniyaga yo‘l oladigan bo‘ldi. Fevral oyida yig‘in o‘tkazish bo‘yicha o‘zimizda ham muammo yuzaga keldi. FIFA kuni bo‘lmagani uchun futbolchilarning o‘zlari ham fevral oyida klub safida bo‘lishni xohladi. Agar ikkita o‘rtoqlik o‘yini tashkil qila olganimizda, yig‘in tashkil qilsak bo‘lardi, bitta o‘yin uchun futbolchilarni yig‘ishdan ma’no yo‘q.

Hozirda esa mart oyi uchun raqiblar qidiryapmiz va deyarli topdik. Bu haqda keyinroq ma’lumot beramiz”, — deydi Testemitsanu.