“Chelsi” rahbariyati va Mourinyo klubning sobiq shifokori Karneyro ishi bo‘yicha sudga chaqirildi

Angliyaning “Chelsi” klubi rahbariyati va “ko‘klar” bosh murabbiyi Joze Mourinyo 2016-yil 6-yanvar kuni jamoaning sobiq shifokori Yeva Karneyroning da’vosi bo‘yicha sudda ko‘rsatma beradi, deb xabar qiladi “Gazeta.ru”.

Karneyro joriy mavsum davomida mojaro bilan “Chelsi”dan ketdi. “Suonsi”ga qarshi bahsda shifokorlar jarohat olgan Eden Azarga yordam berish uchun maydonga chiqdi. Ammo Mourinyoning fikricha, futbolchining jarohati jiddiy emas edi va shifokorlar, shu jumladan Karneyro ham bu ishi bilan “Chelsi” g‘alabani ilib ketishiga xalaqit bergan. Shundan keyin ayolni avvaliga ishdan chetlatishdi, keyinroq esa butkul bo‘shatishdi.

Karneyro portugaliyalik murabbiy uni kamsitgan, London klubi rahbariyati esa noqonuniy bo‘shatgan, deb hisoblamoqda. Hozirda Yeva tovon puli undirish va vazifasiga tiklanishga erishmoqchi.