Facebook ijtimoiy tarmoq foydalanuvchilari o‘rtasida 2015-yil yakunlari bo‘yicha eng ko‘p muhokama etilgan mavzular reytingini e’lon qildi. Top-10 joriy yil yanvaridan dekabrga qadar Facebook postlarida u yoki bu mavzu qancha ko‘p tilga olingani asosida tuzilgan, deya xabar beradi “TASS”.
Ma’lum bo‘lishicha, foydalanuvchilar o‘rtasida eng ko‘p AQSh prezidentligiga saylovlar mavzusi muhokama etilgan. Keyingi o‘rinda 13-noyabrda Parijda ro‘y bergan teraktlar, uchinchi o‘rinda esa Suriyadagi fuqarolar urushi va qochoqlar masalasi qayd etilgan.
Shuningdek, Nepaldagi zilzila, Gretsiyadagi qarz bilan bog‘liq inqiroz, nikohlar tengligi, IShIDga qarshi kurash, terrorchilarning Parijda Charlie Hebdo tahririyatiga hujumi, Baltimordagi noroziliklar, Charlstondagi fojia va Konfederatsiya bayrog‘i atrofidagi bahslar ham mazkur reytingdan o‘rin olgan.
Dunyo siyosatdonlari orasida Facebook’da AQSh prezidenti Barak Obama, AQSh prezidentligiga nomzod Donald Tramp, Braziliya prezidenti Dilma Russeff tez-tez tilga olingan. Eng ko‘p muhokama etilgan sportchilar qatorida bokschilar Floyd Meyvezer va Menni Pakyao qayd etilgan. Eng ommalashgan film “Yulduzlar jangi: kuchning uyg‘onishi”, serial “Taxtlar o‘yini”, kompyuter o‘yini esa FIFA-15 bo‘lgan.
Izoh (0)