2015-yilning 5—6-dekabr kunlari Toshkent axborot texnologiyalari universitetida Shimoli-Sharqiy Yevropa guruhida dasturlash bo‘yicha jahon chempionati yarim final bosqichi musobaqalari bo‘lib o‘tdi. Bu haqda universitet axborot xizmati xabar bermoqda.
O‘zbekistondan 26, Qozog‘istondan 24 va Qirg‘izistondan 2 ta jamoa final yo‘llanmasini qo‘lga kiritish uchun kurashdi.
Musobaqaning yakuniy natijalariga ko‘ra, Toshkent axborot texnologiyalari universitetining 1-jamoasi Tashkent U of IT 1 yettita masala ishlagan holda birinchi o‘rinni egalladi. Qozog‘istonning Kazakh-British TU 1 va Kazakh-British TU 4 jamoalari 7 va 6 ta masala ishlagan holda ikkinchi va uchinchi o‘rinlarni egalladi.
Musobaqa bir vaqtning o‘zida, shuningdek, Sank-Peterburg, Barnaul va Tblisi shaharlarida ham bo‘lib o‘tdi. Musobaqa reglamentiga ko‘ra, jamoalarga 5 soat mobaynida turli qiyinlikdagi 12 ta masala berildi va jamoalar ularni belgilangan dasturlash tillari yordamida eng kam vaqt sarflab yechishlari lozim bo‘ldi. Shimoli-Sharqiy Yevropa guruhida eng yaxshi natijalarni qo‘lga kiritgan jamoalardan finalchilar tanlab olinadi va tez orada e’lon qilinadi. Finalga bitta oliy ta’lim muassasasidan faqatgina bitta jamoa chiqishi mumkin.
Izoh (0)