Iqlim bo‘yicha BMT Jahon konferensiyasi (COP-21) arafasida Fransiya hukumati tomonidan qabul qilingan misli ko‘rilmagan xavfsizlik choralari atrof-muhit himoyasini yoqlab chiquvchi tashkilotlar tomonidan tanqid qilindi, deya xabar bermoqda “TASS”.
“Odamlarni erkinlikdan va asosiy huquqlardan mahrum qilish yo‘li bilan iqlim isishiga qarshi kurashib bo‘lmaydi”, — deyiladi Fransiyada 28-noyabr kuni tarqatilgan kommyunikeda. U 130 ta xalqaro nohukumat tashkilotlar, shu jumladan, Greenpeace va Jahon yovvoyi tabiat fondi tomonidan imzolangan.
So‘nggi bir necha oy davomida “yashillar” COP-21 sammiti doirasida keng ko‘lamli aksiyalar uyushtirishni rejalashtirgan edi, biroq Fransiyada favqulodda holat rejimi joriy etilgach, ularning barchasi taqiqlandi.
Bundan tashqari, Greenpeace’ning Fransiyadagi ofisi vakillari so‘zlariga ko‘ra, milliy xavfsizlikka nisbatan tahdidlarni aniqlash bahonasi ostida Fransiya politsiyasi “yashillar” harakati faollarini tintuv qilib, ularning 24 nafari COP-21 sammitida xavfsizlik choralarini ta’minlash doirasida uy qamog‘iga hukm qilingan.
Iqlim o‘zgarishlari masalalari bo‘yicha konferensiya Parijda 30-noyabrdan 11-dekabrga qadar bo‘lib o‘tadi.
Izoh (0)