Иқлим бўйича БМТ Жаҳон конференцияси (COP-21) арафасида Франция ҳукумати томонидан қабул қилинган мисли кўрилмаган хавфсизлик чоралари атроф-муҳит ҳимоясини ёқлаб чиқувчи ташкилотлар томонидан танқид қилинди, дея хабар бермоқда «ТАСС».
«Одамларни эркинликдан ва асосий ҳуқуқлардан маҳрум қилиш йўли билан иқлим исишига қарши курашиб бўлмайди», — дейилади Францияда 28 ноябрь куни тарқатилган коммюникеда. У 130 та халқаро ноҳукумат ташкилотлар, шу жумладан, Greenpeace ва Жаҳон ёввойи табиат фонди томонидан имзоланган.
Сўнгги бир неча ой давомида «яшиллар» COP-21 саммити доирасида кенг кўламли акциялар уюштиришни режалаштирган эди, бироқ Францияда фавқулодда ҳолат режими жорий этилгач, уларнинг барчаси тақиқланди.
Бундан ташқари, Greenpeace’нинг Франциядаги офиси вакиллари сўзларига кўра, миллий хавфсизликка нисбатан таҳдидларни аниқлаш баҳонаси остида Франция полицияси «яшиллар» ҳаракати фаолларини тинтув қилиб, уларнинг 24 нафари COP-21 саммитида хавфсизлик чораларини таъминлаш доирасида уй қамоғига ҳукм қилинган.
Иқлим ўзгаришлари масалалари бўйича конференция Парижда 30 ноябрдан 11 декабрга қадар бўлиб ўтади.
Изоҳ (0)